Im Joor 1999 hänn mir s’erscht Mol offiziel am Aescher Fasnachtsumzug mitgmacht.

Aagfange het’s aber scho vorhär.

D’Schüeler von ere fünfte Primarklass hänn unbedingt welle mit ,,richtige‘‘ Waggislarve an dr Chinderfasnacht mit mache. Mit em Lehrer und viel Arbet het me das denn aanebrocht.

S’het e paarne vo dene Schüeler so guet gfalle, dass Sie au am grosse Fasnachtsumzug am Sunntig no hänn wölle durchs Dorf laufe.

Kurzum het me Räppli und Orange organisiert und denn sinn e paar Eltere mit Leiterwägeli und ere Hampfle Chinder an d’Fasnacht.

Me hets luschtig gha zäme und das isch denn dr Startschuss gsi für d Staiwaggis Aesch.

Im Joor 2005 hän mr den s erscht mol e "grosse" Wage baut.

"Schuel Im Container" het s damalige Sujet gheisse. Sit den mache mir jedes Joor e neue Wage, wo mehreri Samschtige dra gschaffe wird.

Disjoor (2009) fiere mir scho s 10-Jöhrige Jubiläum.

Disjoor hen mr uns au ändlig vo de Leiterwägeli könne befreie!

In dem Sinn wünsche mr allne e schöni Fasnacht, und me seht sich!