Unseri Schnitzelbängg vom Joor 2005 - 2009:

 

Sujet 2009: < 10-Joor Staiwaggis >

 

 

Uns gitt’s scho 10 Joor das isch toll

mir finde dasch doch wundervoll

trotz dr grosse Wirtschaftskriese

löhn mir uns d‘ Fasnacht nit vermiese

 

 

S’ neuschte Fach an unserer Schuel

do haut’s dr gröschti Ochs vom Stuel

sigg schien’s hänn mir uns  lo sage

Hose uufe , Hose abe

 

 

 

Z’ Aesch Nord het d‘ Rofra welle baue

do hett’s in voll uff d’Schnauze ghaue

ich dängg uff unserer Gmeini hinde

wird me scho no ä Wägli finde

 

 

D‘ Fasnachtsdeko ä leidigs Thema

het im Dorf do z‘ Aesch kei Schema

alles wird blump ufe bunde

wie’s goht hänn mir in Rynach gfunde

 

 

Am 1. Auguscht bim Buurezmorge

mache sich Buure bim z’Morge Sorge

wenn griege mir für unsere Garte

wie d’ UBS  au Miliarde

 

 

 

 

 

Dr Bruno Theiler hett sitt Joore

keini Wahle meh verlore

für Propoganda wo mir mache

sott dä zahle und nit nur lache

 

 

Hets Yis und Schnee uff unsere Stroose

duet’s chalt durch alli Hüser blose

gsehsch sie im Wärgghof seelig schlofe

vier vorem und drey hinterem Oofe

 

 

Wenn‘s z‘ Esse und no z‘ Dringge gitt

isch  unsere Gmeindrot gar nit witt

gohts um Politischi Belange

gsehsch kein es sin scho alli gange

 

 

Sujet 2008: < Mir mache ä Stai >

Am Samschtig gosch in's Dorf go poschte, 

wie allewyl darf's nüt choschte

Budget und Prix Garantie,

halte dini Pryse chli

chunsch vom Getümmel ändlig use,

bisch uff dr Schnure, wotsch go pfuuse

do haut Di ein vom Märtstand a,

muesch nit no Brot und Fondue ha?

he doch dasch guet, do machsch kei Stai,

und gosch mit volle Däsche hei

----

D'Mühli het ä neue Pächter

s'isch nit besser, nei s'isch schlächter

gosch mit Chohldampf in dä Schuppe

wartsch ä Stund uff dini Suppe

willsch nur rasch ä Häppli ässe

s'isch nit eifach, chasch's vergässe

wotsch Pommes, muesch am Vordaag beschtelle

dr Choch riert dört nur lahm si Chelle

drumm mache mir ä suure Stai

und göhn mit leerem Ranze hei.

----

D'Euro 08, s'git nümm so lang

zieht uns voll in ihre Bann

s'Fuessballfieber isch ussbroche

und befallt fascht jede Chnoche

ä Fancamp z'Aesch isch doch famos

und d'Freud bi uns drumm riese gross

dr Köbi seit: dr Titel weller

das möcht au unsere Marco Streller

jetzt singe mir: "chumm bring in hei"

und keine macht ä blöde Stai

----

In Aesch by Gott, het me Visione

egal wie tüür, s'choscht Millione

me möcht ä See zum s'Füüdle schwängge

möglichscht gross, fascht bis Biel-Bängge

dr Cyrill duet sie Schluchboot pumpe

und s'Marianne gsehsch blöd ummegumpe

so soll Aesch in Zuekunft wärde

viellicht sogar mit Schrebergärte

me fühlt sich wohl und au dehei

trotzdäm macht s'Volk e suure Stai.

----

Zäh mohl sinn mir jetzt scho derby

oder chöntes ächt scho Elf mohl sy

es isch egal ob Elf ob Zäh

die Joor die cha uns keine näh

mir hänn dr Plausch und sehr vyl Spass

und sinn drei Daag lang uff dr Gass

unsere Waage zeigt ä Stai

und mir göhn ohni Pämierig hei

das macht uns nüt, liebs Comitée

Dir wärdet uns au s'nägscht Joor gseh

 

 

 

 

Sujet 2007:  < Mir schliiche dur s Dorf >

 

Wenn's z'Aesch by Gott z'Nacht dunkel wird

ä Schof no usschau haltet nach sim Hirt

viel Volg in d'Mehrzwäckhalle lauft

kai Mensch im Dorf no öbbis chauft

au d'Schuele nymme offe hänn

will d'Lehrer gar kei Schuel me gänn

denn isch's in unserem Dorf sowyt

s'gitt wieder Tämpo 30 Strytt.

----------

Me redet, schimpft, duet diskutiere

und do derby nit viel studiere

d'Hauptsach isch s'wird öbbis gseit

egal wie blöd s'duet keinem leid

es git ä Kampf zwische Parteie

me losst sogar Kollege gheie

das isch doch toll, so isch's ä Hit

s'gitt wieder Tämpo 30 Strytt.

-----------

ob SP oder FDP, villicht am Schluss dr FCB

jede meint er sigg im Rächt

was andri sage isch doch nur schlächt

so wird in Aesch politisiert

und nur no grossi Sprüch riskiert

jede schribt im Chäsblatt inne

s'isch nit zum Glaube, fosch a spinne

nur mir hänn rächt, nur mir sinn fit

s'gitt wieder Tämpo 30 Strytt.

----------

Und d'Marianne, vom Schlössli hinde

längt zwischedure au in d'Dinte

s'isch doch verständlig, by däm Buff

irgend wenn wird jede muff

Sie hett schiens Bürgerrächt beschnitte

das isch nit guet, s'hänn alli glitte

drumm glaube mir, s'isch an dr Zyt

ändlig Tämpo 30 Strytt.

-----------

Ob Tämpo 30 oder meh,

ob Sunne, Räge oder Schnee

ob Chlus, Steiacker oder Schützematt

mit z'hochem Tämpo farsch jede platt

das git uns allne sicher z'Dängge

drumm lieber schliche und beschrängge

viel Vorsicht, langsam nit so munter

sunnscht chunnnt denn no dr Theiler drunter

-----------

Mir schliiche au, mit unserem Schnägg

und chömme praktisch nit vom Flägg

so wird's mit Tämpo 30 goh,

au andri Sache blybe stoh

do brucht's no mehreri Rundi Tisch

bis s'richtige Tämpo gfunde isch.

 

 

 

Sujet 2006:  < Brandeburger Füürwehrkongräss >

 

Am Füürwehrkongräss do z Aesch by Gott

Es brenne Chäre, s git nur Schrott

Verstreut am Bode lige Lyche,

do chöme Schwarzi Männli z schliiche

si träge Bläch uf ihrem Kopf,

das schützt e Glatze oder Zopf

sie springe umme wie die Wilde

Und dien mit Schlüch e Kreisli bilde

Denn wird gschprützt uss volle Rohr,

s isch alles nass, au mini Hoor

s gseht uss wie ächt es isch ganz toll

und z Obe sin alli voll.

----

Uf eimol gits am Himmel Lärm

Es isch ä Heli direkt us Bärn

Dr Sämi Schmid losst sich nid lumpe

Und will do z Aesch au ummegumpe

Ihm macht das Spass me gseht ihn lache

Er het dr Plausch an dene Sache.

Bim z Mittagesse uss Gamälle,

macht unsere Gmeindroot ihm ä Wälle

und d Marianne seit zu ihm ganz duuch

derzue chrault si ganz fyyn sy Buuch,

ich hätt e Wunsch I due nid liege

I möchte doch au gärn Heli fliege.

----

Am Samschtig gits e Galaoobe,

mit Prominenz und halt au Schwoobe

s het Muusig, z Dringge und au z Ässe,

nur die im Zält het me vergesse

dört sitzt dr Pöbel und mues warte,

s git gar nüd z foode s isch ä Harte.

Ein triffsch immer s isch gar kei Hit,

wenns gratis öbbis z suffe git,

do stoht är z vorderscht dört ischs halt geiler,

chasch dreymool roote, s isch dr Theiler.

----

Au d Jugenfüürwehr chasch bestuhne,

die chöme druss, sinn keini Pflume

Sie zeige vyl und hänn au Muet,

denn jede het doch Füür im Bluet

drumm goht dr Dangg do no an Yvo

dä zeigd halt doch e gwüsses Niveau.

----

So das isch gnueg mir wenn jetzt hööre

Und lönd uns drumm vo keim me stöhre

Mir gniesse d Fasnacht was jede sott

Und griesse do uss Aesch by Gott.

 

 

 

Sujet 2005:  < Schuel im Container >

 

Loset zue, s sinn keini Gschichte,

Wo mir jetzt do wärde brichte

so isch d Schuel, so laufts bi uns

und mir verzelle do kei Brunz.

----

Bisch zweni hell und muesch no lehre,

griegsch uf d Nuss, denn muesch di wehre

Rauche und Kiffe duet sich mehre

machsch nid mit bikunsch uf d Schneere

S isch cool und geil, und d Lehrer sin doof,

nur Schlegereie im Pausehof.

----

Drumm meine mir es isch vyl scheener,

Schuel ha imene Blächcontainer

----

Heissi Jeans und knabbi Shirts,

jede chunnt und keine hörts

chasch cho und go wenns dr grad basst,

mit Kopfduech, Mütze wirdsch nid gschasst

bisch schwarz bisch gääl bisch rot bisch blau,

das intressiert doch do kei Sau

----

Drumm meine mir es isch vyl scheener,

Schuel ha imene Blächcontainer

----

Me seit nümm Merci oder Dangge

Das isch nid inn, denn bisch e chrangge

All vier Wuche bald e Lager

Do wird dr Gäldsagg dünn und mager

Das stört uns nid so isches easy

Es will doch jede voll dr bii sii.

----

Drumm meine mir es isch vyl scheener,

Schuel ha imene Blächcontainer

----

So mueses sii so ischs doch toll,

au d Lehrer hen bald d Schnauze voll

statt Pausebrot gits nur no Dönner

das haltet fit und macht schöner

ob erschti oder achti Klass

so macht d Schuel in Aesch doch Spass

----

Drumm meine mir es isch vyl scheener,

Schuel ha imene Blächcontainer

----

Ae grosse Dangg goht do vyl eher

An unsre gleine Schuelvorsteher

Er luegt das alles beschtens lauft

Und er sich selber guet verchauft

Us dem Grund isches mit em Theiler

z Aesch an der Schuel doch eifach geiler.